-“बाजै दाव बिखाया आंनिखा हले।”
-“जागोन दे आगै, आं बुंनाय बादि जाबानो जायो।” बाथ्राखौ बुंनानै हाखु दाखु बाजैया आदा मेरांनि सायकेल केरिआराव बारखोना गावनि बिमानि गामि अक’माति फारसे बिं बिं थांओ।
मिंमांआ बर’नि जारिमिनाव जायगा आवग्रिनो हानाय दाबसे मुंदांखा थावनि। कख्राझार, गवालपारा, कामरुप आरो उदालगिरि जिल्लानिफ्राय रोजा रोजा बर’ फिसाफोरा फैनानै हादान सिफायना जुगामियै राज्यो जाबोदों बे हालामाव। आंनि जोनोमाबो मिंमांनि गेरमेर गामिआवनो जादों। गेरमेर मुंआ मिसिं (जायखौ जों मिरि होन्नानै मोनथियो) सोदोब गेरमेनिफ्राय फैनाय। गेरमेनि ओंथिया ना-थुरि। अदेबानि बे दैसायाव जोबोत ना-थुरि मोनसोगारोमोन। जानोहागौ मिसिंफोरा बिनिखायनो दैसानि मुंखौ गेरमेर दोन्दों। थामहिनबा गेरमेनिफ्रायनो गेरमेर जादों होन्ना मोनथिनो मोन्दों। अरुनाचल हाजोनिफ्राय बोहैबोनाय गेरमेर दैसाखौ गुबुन गुबुन थावनियाव गुबुन गुबुन मुंयै मोनथियो। खर’थाराव तराजान, जोंनि खन्दआव गेरमेर आरो आफांआव न’न’दि मुंयै मुंदांखा गेरमेर दैसाया जियाधल दैमाजों गोरोबहैना बुरलुंबुथुर दैमायाव गोग्लैहैदों। मिंमां मुंआबो मिसिं सोदोब निफ्रायनो फैनाय। बेनि ओंथिआ जादों ‘मिं’ माने ‘ताणि’ एबा सुबुं आरो ‘मां’ माने ‘कामां’ एबा गैया, थामहिनबा सुबुं गैयै थावनि।
जोंनि गामिया मिसिं-बर’ गलाय मोनदेर। मिसिंफोराबो बर’ राव रोंगौ आरो बर’फोराबो मिसिं राव रोंगौ। रावबो रायखोमालायनो हाया। गोरोबलायैनि गेजेराव खौसे होनोब्ला जों लागोआबो मोनसे रायखांनाय (reference)। सावरि-बादालि हाबा-हुखा जेरावबो ज’-ज’ जा-जाय बे गामिनि आसार खान्थिआ थामजिसे बोसोरनि उनावबो बेनोबे। बबेखानि गामिनि सावगारिया हले इसेबो सोलायाखै। मोनथिया दिनैसिमबो बे गामिनि लामा दालांखौ जौगाहोनो थाखाय सरकारा मानो नाजायाखै।
1991 माइथायावनो आं गामिखौ नागारनानै गुबुन जायगायाव दोरोदलांओ। गावबागाव थांना थानायनि थाखाय बयबो माबा मोनसे मिजिं लानानै बिथिं दावबायनाया सुबुंनि आखु। जानो हागौ आंबो बे थांखिजोंनो गामि नागारनानै
गुबुन मोनसे थावनियाव दावबायारि महरै थामजिसे बोसोर आनद्रायना दिनै आंगोनि बे जोनोम जायगायाव आगान होफैदों।
गामिनि गोबांथार आंगोफोरा बे मुलुग बिखायाव गैलिया। गागिफोरनि गेजेराव साब्रैसोल’ दंथारसै। बांसिनखौनो सिनाय हालिया। उन्दै उन्दै गथ’फोरा देरनानै हाबा जानानै गोदान नबथि लाजोब्बाय। सोलोंथायनि बेलायाव हले सोमोनांथारबाय आं। नखरफ्रोमावबो एम ए नंआब्ला बिए उथ्रिनाय गथ’फोर दं।
गोबावथारनि उनाव नुजाफैना गामिनि थासारिखौ नुनानै आं जेसेबां गोजोन्नाय मोन्दों बेनिख्रुयबो बांसिन सोमोनांनाय रंजाथावनाया जादों गामिनि बाय-बाहागि आरो हालामनि रायजो राजाफोरनि दाव दाव खालामनाया। इंराजियाव मोनसे बाथ्रा दं -Home sweet home होन्नाय। नखर एबा गामिनिख्रुइ दैसिन एबा आंगोसिन मुंबो थानो हामारा। नाथाय, आंनि गोसोआव माबा मोनसे खें खें थुबाय थादों। थामजिसे बोसोरनि आगुआव गुलि गुलि खालामबोनाय बाजै अनिताखौ नायनो लुबैना आदा मेरांनि न’ फारसे नायहरबायब्लाबो नुआखै। सित्लायाव साबासो उन्दै उन्दै गथ’फोरा ओंखाम ओंख्रि गेलेबाय थादों। साखाथियाव सासे बुरैसा जिरायना दं। मोखांआ खोलाफारसेखाय सिनायहाहराखै। जानोहागौ बै गथ’फोरनि बिबै। बा, मा एफाग्राब सोमोनांथाव गामिमार, दिनैनि नैजिसे जौथायावबो गथ’फोरा ओंखाम ओंख्रि गेलेबावो ।
गोसोखौ गनायनो हाथारैनि आदा मेरांनि न’ फारसे आं दावगालांथारो। बैसानकालि, जेब्ला बाजैया आदा मेरांनि साइकेलाव गाखोना गावस्रानि न’ अक’माटि फारसे थांनायाव नुज्लायनाय आरो रायज्लायनाय, बेनो जोबथा लोगो मोनज्लायनायमोन। लांगोना मोनहैमारनो ‘आदालै-आदा’ होन्ना गाबज्रिनानै सित्ला फारसे आं आवगायलांस्राबावो। आंनि गाबज्रिनायखौ खोनानानै मुरा सायाव जिरायनाय आयजोआ लांगोना फारसे नायख्लेंहरो आरो गोबारै होख्रावनानै बुंओ- “ऐ ‘दबसं’ नों फैदों। फै फै जिरायफै, नोंदाया माय हाहैदों, जिरायफै”। हां खनसेनो बुंओ बाजैया। बाजैआ खर’ फुरबाय। जानो हागौ गामिनि आयजोखाय माय हानाय आरो बायदि बायला खामानि मावनांनायनि थाखाय मोखांआ इसे खामब्रें-ब्रें जाबाय। देहाया हले दाबो राफोत-फोत थार। गाव जिरायनाय मुराखौ बोथ्रोतना आंखौ जिरायनो होदोंमोन बाजैआ। एसेआवनि बाजैनि आइथिंखौ हमनानै गुग्रुब खुलुमो आं।
बाजैआ रुखु-रुखु गाबो। अब्लाबो गावनि आग्दा आखायखौ आंनि खर’आव दांनानै बुओ; “-दे जिरायदो, दानो थैखाया नों। सेंग्रासिनसो नुलायलांदों।” बाजैनि अन्नाय आरो रैसुमै रावा जोबोत मेहेरगोनां। हाइलाग गोदोनि बादिनो बिनि राव आरो फावा। माबा माबि बुंबावदोंमोन जानांगौ बाजैआ। नाथाय, बाजैनि मोखांआव नायनानै गल’-ल’ नायगोमोफ्लांओ आं। “-यै दबसं मा नायगोमोखो ? दाव बिखा नंदों नामा आंखौ। गैला सेवलांबाय।” हरखाब बाग्दावखांओ आं।
अनिता दले, आदा मेरां तायुंनि बिसि। थाखो गुआव फरायबाय थानाय समावनो जोंनि गामिनिनो गुदि फरायसालिनि फोरोंगिरि मुस्रि मेरां तायुंजों हाबा जाफैयो अक’माटिनिफ्राय। बिसि-फिसाय सानैबो जा अनलायखायो। बिसोर सानैनि दाव दाव खालामलायनायखौ नुनानै गुबुनफोरा मेगन सासोगारोमोन। बाजैया आदा मेरांखौ अन्नायजों मेरां होन्नानैनो गाबज्रियो। मेरांनि ओंथिया मोस्रोम। आफाया आदाखौ मानो मेरां दोनामोनथाय बुंस’ हाया।
आंनि आफा आरो आदा मेरांनि बिफा सानैबो बिसिगिमोन। बिनिखायनो आदा मेरां मोनहानि न’आव आं फ्राय थांलाय फैलाय खालामोमोन। माब्लाबा माब्लाबा सानसेआव खेब्रैगाहाम जालायोमोन। आदायाबो आंखौ जोबोत अनसोगारोमोन। नाथाय, बाजै अनितानि अन्नाया बिबोनांब्लाबो इसे आलादा। आंखौ गावनि गोरबोजों मोजां मोनफ्लेनायखौ फोरमायोमोन बाजैया। अन्नायजोंनो दबसं होन्ना गाबज्रियोमोन बियो। ‘दबसं’ सोदोबाबो मिसिं सोदोब। बिनि ओंथिआ सिखाव। आं बाजैनि गोसोखौ खावनो हादोंनो, बिनिखायनो अन्नायजों सिखाव होन्ना गाबज्रियोमोन।
थामजिसे बोसोरनि उनाव गामियाव फैनानै लोगो मोनलायनाय, सानैबो मोजां गाज्रि सोंलाय फिनलाय खालामलायबाय थानाय समाव बाजैनि फिसौफोरा दावराव दावसि खालामनायनि फिसौफोरखौ गोजानाव गेलेहैनो हुहरना बिहामजोखौ जोंनि थाखाय साहा फुदुंनो थोनहरो बाजैया। दानदिसे उनाव आपिया जों सानैनि थाखाय साहा होफैयो। साहा लोंफुबाय थानाय समाव बाजैया सिरि सिरिमोन। आंबो माबा माबि सानफ्लांबाय थादोंमोन। दाव बिखाया सेवबाय होन्नायखौ खोनानानै सोंनो सानब्लाबो आं साहस जायाखै। थेवबो गोसोखौ फोराथारनानै “-आसिनायां आ दा बहा दं बाजै?” होन्नानै सोंओ।”-गैला आगै, गु बोसोर जाबाय। गावनो आंनि मिजिंखौ लाखिनो रोंआखिसै। मा खालामनो, बेनि थाखाय आंनो दायनि गिरि आगै।” बाजैया मोखां सोम सोम फोरमायना दुफुं सिखारना न’ सिंआव हाबलांयो।
बाजै अनिताहा सासे बिनानाव दंमोन, मुंआ आसिनायां । आसिनायांनि ओंथिआ गोरबोनि अन्नाय। आं दाव बिखा होन्ना गाबज्रियोमोन बिखौ। आसिनायां आबो बिब’नि न’आवनो थानानै कोदोमगुरि गोजौ फरायसालियाव फरायफैयो। डाइन थाखोनिफ्राय जि थाखोसिम आंबो आसिनायांखौ एखेराहै बोसोरथामनि थाखाय लोगो मोन्दों। सोमोन्दोआव बिगुमै बिबोनां जालायनायलाय बोसोरथामनि गेजेराव जों सानैनि सोमोन्दोआ जोबोद गोथौसिम सहैबायमोन। जों सानैनि गोसोनि सोमोनदोखौ नुनानै बाजैया रंजाकांदोंमोन जानांगौ। अब्लाबो सिमा बारजानो गिनानै सानसेखालि आंखौ गावसिनि नआवनो थारला थुरला बुंनानै होबाय; “-आं नोंसोर सानैनि गोसोनि मोजां मोनलायनायखौ मोनथिगौ। दा नाथाय बे समा फरायना सोलोंथाय लानायनि सम। फरायग्रो आरो सानैबो गिदिर मानसि जाग्रो। आं जेब्लायबो नोंसोरजों दं।” आंनि गोसोआ रंजानायजों जेबो बुंनोनो रोंयै जायो। गोसो जादोंमोन खुसिजोंनो बाजैखौ गोबाख्रबना हामबाय होन्नो। थेवबो गोसोखौ हमथानो हायैयाव बाजैनि मानबायस्लिंनो हानाय फिसाज्ला दुलालखौनो बामखांना सब खुदुमना दाव बिखानो होनानै हाखु दाखु ओंखारबोयो आं। “- जावलिआया” होन्नानै बाजैया आंखौ आखाय दैखांनानै बुनो नागिरदोंमोन। माब्लाजे ननि सौरा न’ मोनफैखोथाय बुंस’ हाया।
दाव बिखाया फरायनायाव आंनिख्रु गोबां गुन साबसिनमोन। मेट्रिक आनजातखौ से थाखोआव उथ्रिनानै बियो जरहात इनजिनियारिं फरायसालिमानिफ्राय चिभिल इनजिनियारिं दिग्रि लायो। उनाव बहा दं आरो मा मावखो आंबो बुंनो हालिया। मेगन गोजान जाब्ला गोसोआबो गोजान जायो होन्नायबादिनो बिदिन्थानि फाख’नाव गोग्लैना दाव बिखाखौ आं बावगार लांबायमोन।
दान्दिसे उनाव बाजैआ थावसे लेखा गुफुर आंनो होफैयो आरो बुंयो, “-आगै नों मा खालामो खालामदो। अन्नानै नोंआदै आरो फिसौफोरखौ एसे गोसोखांफादो।”
मोनथिस्लाबा जासेनो सारअन्थाय गोग्लैनाय बादि मोनो आं। आखायनि खाकोर बिलायखौ फरायनानै बिलिर बिलिर आं रुखु रुखु गाबफ्लांयो। आंनि सान्नायाजे गेना आरो गोरोन्थि बिखौ दाव बिखाय दिन्थि लांबाय। बाजै अनितानि बुंनाय लेखा आसिनायां आ गावनि जिउ जोबजासेयाव आंखौनो नेनानै दंमोन। गुवहाटि रिफाइनारि आव जिडाइन बोसोर साख्रि मावनानै मोन्नाय दानबान्थानि डजि जौखोन्दो खौनो बियो इनसुरेन्सआव दोनदोंमोन; आरो बिनि न’मिनिआ आंमोन, बिसाय मुस्रि गालुर बसुमतारि।
बाजैआ खामफ्लायाव जिरायना ख’खाबखौ हान्थुआव सोनारना सिरि सिरि दंमोन। आंबो दुखु-दाहाजों मोदै रुखु रुखु गाब्बाय थादोंमोन। एसेयाव आदा मेरांआ दुब्लिनिफ्राय माय दांग्रि ज्राव ज्राव बान्नानै सित्लायाव गसंफैयो।
