दुफावलु जोमैयाव थाखोमा थाखोमा
सुखुनि समावल’ नुजाफैयो हुरा हुरा
सिमां मोगथां जाना साया माया
सोर जाखो नों सिनायथि मानो लाया।
आजै आजौब्ला नों जोंनि फोलेरनि
खालामफै हेफाजाब अलख’द समाव
थुलुंगाफै आंखौ दावहानि बे बुब्लियाव
गोनांथि नोंनि हारि रैखाथिनि ।
सुथुरसो नामा नोंलाय ?
मिनिखैरो-रो खालामो आंखौ बरायनो
हायना सारफ्रावना जुलि लानो
सानदों नामा आंखौ एचिमलेशन खालामनो ?
सुथुरब्ला नों खोनासं फंसे राव
माब्लाबाबो दासान आं गोदाव सोराव
आंबो सासे आयजो गोदान मुगानि
हानाय नङा खालामनो आंखौ आनि थानि
नुम’लि, बिरगोस्रि आरो रोनसुनद्रिनि थै थासानदि ।
आंगोब्ला नों आंजों नुजाफै
गेलेनो दासान आमै जिमै
नुआखै बोहैदों जेथिंबो मुंख्लंनि थै
हारिनि अलखदावबो लाजि मानो रोङाखै।
गोहो गोलोन्दांब्ला स्रि स्राय था
गुबुननि मावनायाव दाहो हेंथा
नङाब्ला जोबस्रांगोन बर’ हारिया
फैमाल जागोन नोंनि रुजु रुमु रायजो जानो सान्नाया।