“-आयै, हनै बाबानि आथिंआव थाम्फै बादों।”
बुंनाय लोगो लोगोनो बिमानि फास्राखौ स्लत बख’नानै बिफानि आथिंआव बानाय थाम्फैखौ बुज्राव हरो आरो गावनि रुइदोब-दोब मिजि-मिजि आसिजों लासै-लासै हुगारना होयो। सोमस्रिया हाखु-दाखु एरखेलांयो आरो न’ सिंआव ध्रोब हाबहैना दबाजों मोखां फांथेना रुखु-रुखु गाबो।
जिब्रै चेप्टेम्बर, मुंख्लं सान। हारिनि थामोन्थानि थाखाय दावहा नांनानै जिउ खोमानांनाय मुंख्लंफोरखौ मान बावनायनि मुंख्लं सान।
सोमस्रि नारजारिया मुंख्लं सुदेम नारजारिनि बिसि। बिसायनि हारिनि थाखाय गावखौ बावसोमनाय आरो बिनि महरखौ अराय जुगामि लाखिनायनि थांखिजों ननि बिगाबाल’ गायग्रा हानि बिगाथाम फान्नानै बिसायखौ फबनाय लांगोना सेरनि मांखर सालियाव बिसाय सुदेम नारजारिनि मुसुखा खाम्फाखौ गायसनदों। बिब्दिनो सोमस्रिया बै मुंख्लं सानाव बिसायनि मुसुखा खाम्फायाव बिबार बावनानै बोसोरफ्रोमबो मान बावबोदों। बबेखानि, बेलाफ्रोमबो बिसायनि खाम्फायाव आलारि बाथि सावनानै बिसायनि आथिं हमना खुलुमनाया सोमस्रिनि हुदाखामोन।
एरैनोबाबो, बा बोसोरनि सासेल’ फिसाज्ला अनजालुआबो बिमाजों बिफानि मांखरसालियाव थांफानानै बिफाखौ आथिंआव हमना मान बावफाहैयोमोन। सिबाय बिमानि गोरबोआव थानाय समावनो बिफा गोमाजायो अनजालुआ।
मोक्थांआव माब्ल्बाबो लोगो मोनफेरै बिफानि आथिंआव हमनानैबा मा बियो; अबंलावरियासो मोनथिसिगोन।
नाथाय, दिनैनि बे मुंख्लं सानाव अनजालुनि बिफानि मुंख्लं खाम्फानि सायाव दाव-दाव खालामनाया सोमस्रिनि बिखाखौ थेर-बेथेर खालामबाय। बिब्दि बुब्लियावनो लामानि थांनाय मानसिफोरा अनजालुनि खामानिखौ नुना ग्लाब ग्लाब मिनिनायाव सोमस्रिया थाथेरनो हायै जायो। सि-सि, सम आरो थासारिया एफाग्राब अन्थाय बिखाना, जे सुबुं माहारिखौ खायसेखौ अनसुला आरो खायसेखौ निस्थुर खालामनो।